Spurt um skammir vegna hatursummæla

Fram hefur komið að nokkrir starfsmenn borgarinnar hafi fengið tiltal vegna hatursummæla sem þeir eiga að hafa látið falla. á opinberum vettvangi; þá um fólk sem snýr að trúarskoðunum þeirra, kynhneigð og uppruna.

RUV greinir frá, en hins vegar liggur ekkert fyrir um hversu margir starfsmennirnir eru og hverskonar ummæli er verið að tala um auk þess sem eitt og annað er óljóst í málinu? Hildur Sverrisdóttir borgarfulltrúi Sjálfstæðisflokksins hefur þegar lagt fram fyrirspurn varðandi þetta atriði.

„Skýr og opinská umræða um þetta mál er mikilvæg svo viðmið og verklag sé skýrt og í samræmi við lög svo að borgin gerist ekki brotleg vegna ólögmætrar skerðingar á tjáningarfrelsi borgarstarfsmanna.“

Í mannréttindastefnu Reykjavíkurborgar segir að Reykjavíkurborg líði ekki hatursorðræðu af hálfu starfsfólks enda sé hatursorðræða brot á almennum hegningarlögum.

Fulltrúar Sjálfstæðisflokksins í mannréttindaráði hafa nú lagt fram eftirfarandi fyrirspurn:

1. Hvað var lagt til grundvallar við matið þegar metið var að ummælin væru hatursorðræða, og er það mat í samræmi við viðmið landsréttar þar um? 

2. Hver mat að ummælin væru hatursorðræða og hverjar eru valdheimildir þess sem metur fyrir hönd borgarinnar hvort að tjáning starfsmanna teljist hatursorðræða?

3. Voru ummælin viðhöfð á vinnutíma og/eða á vettvangi borgarinnar? 

4. Á hvaða forsendum var það metið sem svo að ummælin væru opinber? 

5. Eru á vettvangi borgarinnar skýr fyrirmæli um hvað teljist hatursorðræða? 

6. Fá starfsmenn borgarinnar fyrirfram fræðslu um hvað sé metið sem hatursorðræða? 

7. Hverjar eru afleiðingar fyrir stöðu eða starf starfsmanna borgarinnar eftir að þeir hafa verið uppvísir að hatursorðræðu?

8. Kemur borgin upplýsingum um hatursorðræðu starfsmanna til lögreglu?