Bjór frá Borg einn af 60 rugluðustu bjórum heims

Bjórinn Fenrir nr.26 frá Borg Brugghús hefur verið valinn í ástralska bók sem fjallar um 60 rugluðustu bjóra heims (e. World Wackiest Brews). Bjórinn er gerður úr taðreyktu malti og er það talið hafa vakið athygli ritstjórnarinnar sem ku hafa leitað að skrýtnustu og undarlegustu aðferðum brugghúsa um heim allan.

Að sögn aðstandenda brugghússins útleggst taðreykingin á ensku sem smoked over a fire of a dried sheep shit og finnst þeim því skiljanlegt að Áströlunum hafi þótt aðferðin merkileg. Búist er við því að bókin komi út í júlí.

Bruggmeistarar Borg gerðu myndband og fóru þar yfir bruggferlið sjálft og hafa nú rúmlega 11 þúsund manns horft á það á YouTube

„Þetta er bara skemmtilegt og verður gaman að sjá í hvaða félagsskap við erum í þessari annars áhugaverðu bók“ segir Sturlaugur Jón Björnsson hjá Borg Brugghúsi.

„Maður gekk lengi með þessa hugmynd í maganum að gera heimsins fyrsta taðreykta bjór, jafnvel áður en bruggferillinn hófst. Ég meðal annars lofaði lærimeistara mínum hjá Russian River-brugghúsinu því að ég mundi klára þetta einn daginn og heimsækja hann með bjórinn – það var gaman að geta staðið við það,“ segir Sturlaugur.

„Hugmyndin fékk byr undir báða vængi þegar við Valgeir Valgeirsson fórum að brugga saman í Borg þar sem hann er einnig mikill áhugamaður um reykingar. Það hefur ennfremur alltaf verið stefna hjá okkur í Borg að nýta íslensk hráefni og menningu við bruggun og það var heldur betur gert þarna. Það er gaman að sjá hversu merkilega framsækið þetta er í eyrum útlendinga á meðan taðreyking hefur verið hversdagslegur hlutur á Íslandi í svo langan tíma“ segir hann ennfremur

Myndbandið má sjá hér að ofan.