Icesave-kröfurnar voru greiddar í gær

Icesave-kröfur Breta og Hollendinga voru greiddar úr slitabúi gamla Landsbankans í gær. Þetta staðfestir upplýsingafulltrúi búsins. „Það er búið að greiða upp allar forgangskröfurnar og lang stærstur hlutinn voru Icesave kröfurnar,“ segir Páll Benediktsson, upplýsingafulltrúi slitabúsins.

Í gær fékk slitabúið, LBI hf., undanþágu frá Seðlabankanum frá fjármagnshöftunum í samræmi við nauðasamninga bankans sem samþykktir voru 25. desember síðastliðinn. Í kjölfarið voru greiddar út kröfur að andvirði 210,6 milljarða íslenskra króna á gengni gærdagsins.

Samtals voru greiddar 706 milljónir evra, 374 milljónir punda og 306 milljónir dala.

Icesave-kröfurnar voru til komnar vegna Icesave netreikninga sem Landsbankinn bauð upp á í Bretlandi og Hollandi en umtalsvert fé safnaðist inn á reikningana. Við fall Landsbankans haustið 2008 var hins vegar ekki hægt að greiða kröfurnar út og greiddu því innustæðutryggingasjóðir í löndunum tveimur út hluta krafnanna. Fyrir vikið eignuðust sjóðirnir kröfur á hendur bankanum.

Eins og flestir muna var Icesve-málið eitt heitasta deilumálið hér á landi eftir hrun og beitti forseti Íslands, Ólafur Ragnar Grímsson, tvívegis neitunarvaldi sínu vegna samninga sem Alþingi samþykkti um endurgreiðslu og ábyrgð ríkisins á kröfunum og vísaði þeim til þjóðarinnar sem hafnaði samningunum í þjóðaratkvæðagreiðslu.

Icesave-málið endaði svo fyrir EFTA-dómstólnum vegna stefnu Hollendinga og Breta þar sem Íslandi var dæmdur sigur í málinu og íslenska ríkið sýknað af kröfum landanna.