Reisa verslunarkjarna í námunda við Keflavíkurflugvöll

Kaupfélag Suðurnesja ætlar að reisa verslunar- og þjónustukjarna skammt frá Keflavíkurflugvelli. Alls mun á annað hundrað manns starfa í kjarnanum sem hefur fengið nafnið Rósaselstorg. Gert er ráð fyrir að framkvæmdir hefjist fljótlega og kjarninn verði tekinn í notkun snemma á næsta ári.

Í tilkynningu segir að þjónustukjarninn verði á 20 þúsund fermetra lóð við síðasta hringtorgið sem ekið er í gegnum áður en komið er að flugstöðinni. Unnið er að uppbyggingunni í samvinnu við sveitarfélagið Garð en byggingarsvæðið er í landi þess.

Nettó-verslun, kaffihús og bensínstöð

Í þjónustukjarnanum er gert ráð fyrir meðalstórri matvöruverslun undir merkjum Nettó, veitinga- og kaffihúsum, ferðatengdri þjónustu og annarri þjónustustarfsemi. Einnig verður þar að finna bensínstöð, en gert er ráð fyrir að samanlagður fermetrafjöldi bygginga á lóðinni verði að lágmarki tvö þúsund fermetrar í fyrsta áfanga.

Skúli Skúlason, stjórnarformaður Kaupfélags Suðurnesja, segir að sú mikla aukning sem orðið hafi á umsvifunum í flugstöðinni kalli á mikla uppbyggingu, bæði á flugvellinum og í næsta nágrenni hans.

„Ekki aðeins hefur fjöldi ferðamanna þrefaldast á skömmum tíma heldur hefur starfsmönnum sem sækja vinnu í flugstöðinni fjölgað um mörg hundruð. Þarna starfa í dag tvö þúsund manns og um þetta ákveðna hringtorg fara nær allir ferðamennirnir okkar, bæði þegar þeir koma til landsins og þegar þeir fara.

Rósaselstorgi er ætlað að þjóna mörgum ólíkum hópum s.s. ferðamönnum og starfsfólki flugstöðvarinnar en einnig þeim fjölmörgu sem útlit er fyrir að starfa muni í Helguvík. Tilkoma þess mun einnig vonandi verða til þess að fleiri gefa sér tíma til að skoða það sem er í boði á svæðinu áður en haldið er áfram til höfuðborgarinnar eða til annarra landshluta.

Kaupfélag Suðurnesja á og rekur hátt í fimmtíu verslunarhúsnæði um land allt og við teljum okkur því vera réttan aðila til að ráðast í þetta brýna verkefni að bæta framboð verslunar og þjónustu á þessum stað,“ segir Skúli.