Mamma Bjarka Más æf yfir vali Arons

Elsa Hrönn Reynisdóttir, framkvæmdastjóri FH og móðir Bjarka Más Elíssonar, landsliðsmanns í handbolta og leikmanns Füchse Berlín í Þýskalandi, er vægast ósátt með ákvörðun Arons Kristjánssonar, landsliðsþjálfara, að taka ekki son sinn með á EM í Póllandi sem hefst eftir viku.

Bjarki Már fékk þær fréttir í gær eftir seinni leik Íslands og Portúgal að hann er ekki á leið með strákunum okkar á EM, en hann var einn þeirra þriggja sem var skorinn frá hópnum í gær.

Stefán Rafn hefur setið mikið á bekknum hjá Rhein-Neckar Löwen undanfarin misseri en hélt alltaf sæti sínu þegar Bjarki Már var að spila í þýsku 2. deildinni.

Nú er Stefán áfram á bekknum á meðan Bjarki er að spila stórt hlutverk hjá Berlínarrefunum í efstu deild þýska boltans.

Óréttlæti

Bjarki taldi það öruggt að hann færi á EM, en í viðtali við Morgunblaðið í desember sagði hann: „Ég bara trúi ekki öðru en ég verði í hópnum sem fer á EM. Í ljósi reynslunnar geng ég ekki út frá því en þætti það óréttlátt ef ég yrði ekki með, það er alveg ljóst.“

Stefán Rafn hafði ekki miklar áhyggjur af stöðu sinni eins og hann sagði frá í viðtali við Vísi í vikunni. Hann þurfti heldur ekki að hafa neinar áhyggjur.

Þetta val Arons á öðrum hornamanni liðsins á eftir fyrliðanum Guðjóni Val Sigurðssyni fer ekki vel í móður Bjarka Rafns sem lætur Aron Kristjánsson heyra það á Facebook og hefur tölfræðina að vopni.

Hún gefur lítið fyrir þær skýringar flestra handboltaspekinga að Stefán Rafn fái sætið því hann er betri bakvörður í varnarleiknum. Hennar strákur fékk ekki einu sinni tækifæri til að spila vörn á móti Portúgal.

Bjarki stóð sig betur

„Bjarki Már var ekki að spila í nógu góðu liði og var ekki með nógu góða nýtingu, þess vegna fékk Stefán Rafn alltaf tækifæri í hjá Aroni,“ segir hún og heldur áfram:

„Núna er Bjarki Már er með 55 mörk og 71,43% nýtingu, komin í gott lið og orðin hornamaður númer eitt. Stefán er með 14 mörk og 46,67% nýtingu auk þess er hann búin að verma bekkinn meira og minna í vetur. Aron ætti þá að standa við orð sín og velja Bjarka en nei, þá eru valdir 3 vinstri hornamenn í landsliðið.“

„Eftir að Aron sagðist ekki vera búinn að velja hópinn í fyrradag þá gerðist það að Bjarki spilaði með B landsliðinu í 30 mín og skoraði 6 mörk . Með A landsliðinu þá fékk Stefán 42 mín og gerði 1 mark úr tveimur skotum og fékk á sig ruðning, línu og glataði boltanum.“

„Bjarki Már fékk 18 mín og skoraði 1 mark úr einu skoti. Hvorn á að velja, jú Stefán valinn því hann er svo góður sem bakk í vörn en Bjarki fékk ekki einu sinni að spreyta sig sem bakk í vörn á þessum 18 mínútum sem hann fékk!!!!!“

Fékk sénsinn í Noregi

Bjarki Már var valinn fram yfir Stefán Rafn þegar landsliðið spilaði þrjá vináttuleiki á móti Noregi, Frakklandi og Danmörku í Gulldeildinni fyrir áramót. Á þeim tíma var Stefán Rafn lítið að spila með Löwen en hann hefur fengið meira að gera eftir að þýski landsliðsmaðurinn Uwe Gensheimer meiddist.

„Auðvitað er alltaf leiðinlegt að vera ekki í hópnum. Markmið mitt er að vera allt í landsliðshópnum og einhvern tímann að verða fyrsti maður,“ sagði hann við Vísi um ákvörðun Arons að velja sig ekki í æfingamótið.

„Það var náttúrlega ekki skemmtilegt en ég nýtti tímann vel til að æfa sjálfur. Ég fékk mér góðan þjálfara og æfði vel þessa viku. Ég reyndi að taka reiðina út með meiri æfingum og vera þá enn tilbúnari núna.“

Nú er Aron Kristjánsson búinn að taka ákvörðun og verður Stefán Rafn annar hornamaður landsliðsins á eftir fyrirliðanum.

Íslenska liðið spilar síðustu leikina í undirbúningnum fyrir EM um helgina á móti Þýskalandi ytra en fyrsti leikurinn á EM verður næsta föstudag á móti Noregi.

Bjarki Már var ekki að spila í nógu góðu liði, var ekki með nógu góða nýtingu þess vegna fékk Stefán Rafn alltaf tækifæ...

Posted by Elsa Hrönn Reynisdóttir on Friday, January 8, 2016