Gert ráð fyrir mun meiri vexti í jólaverslun á milli ára en sést hefur frá hruni

Rannsóknarsetur verslunarinnar áætlar að jólaverslunin aukist um 10,3 prósent frá síðasta ári. Samkvæmt spánni er gert ráð fyrir mun meiri vexti í jólaverslun á milli ára en sést hefur frá bankahruninu árið 2008.

Þetta kemur fram í skýrslu rannsóknarsetursins um jólagjafaverslun árið 2016. Þar segir að vaxandi hagvöxtur og aukin einkaneysla gefi vísbendingu um að velta smásöluverslunar muni ná nýjum hæðum nú í aðdraganda jóla.

Árið 2014 nam vöxtur jólaverslunar 4,5 prósentum, í fyrra var vöxturinn 6,6 prósent en í ár er gert ráð fyrir 10,3 prósenta vexti.

Gert er ráð fyrir því að vöxtur í sérverslun verði meiri en í dagvöru.

Fram kemur í skýrslunni að hver Íslendingur muni að jafnaði eyða rúmum 53 þúsund krónum til innkaupa í nóvember og desember. Þessi upphæð nam 49 þúsund krónum í fyrra.

Rannsóknarsetrið tekur dæmi um fjögurra manna fjölskyldu. Hún mun eyða um 215 þúsund krónum í jólahald í ár.

Vöxtur hefur verið í allri tegund verslunar að undanförnu, til að mynda í dagvöru. Það þýðir að landinn mun gera vel við sig í mat og drykk um hátíðirnar.

Þá er gert ráð fyrir aukinni sölu í raftækjum til afþreyingar sem gætu ratað í jólapakkana í ár.

Um er að ræða raftæki sem öll fjölskyldan getur notað, eins og leikjatölvu. Þá má gera ráð fyrir aukinni sölu á sjónvörpum og snjallsímum.

Verðlækkun hefur orðið á fötum frá síðasta ári vegna afnáms tolla um síðustu áramót. Líkur eru á að sala á fötum aukist að magni til fyrir jólin en á móti kemur að mun hagstæðara hefur orðið fyrir Íslendinga að kaupa vörur í útlöndum. Því má gera ráð fyrir að vinsældir þess að kaupa föt í útlöndum minnki ekki fyrir þessi jól.

Áberandi hefur verið að jólaverslun er að færast meira á netið en ætla má að hluti neytenda kaupi allar eða hluta jólagjafa á netinu, ýmist frá erlendum eða innlendum netverslunum. Velta netverslana fyrir jólin í fyrra var 14,6 prósentum meiri en árin á undan og gera má ráð fyrir aukningu í ár.