Safna fé fyrir Ágústu Örnu

Styrktarreikningur hefur verið stofnaður fyrir Ágústu Örnu en hún lamaðist þegar hún féll niður um op á neyðarútgangi á þriðju hæð á Selfossi fyrr í vikunni.

Ágústa féll rúmlega sex metra en í frétt á vef Sunnlenska um söfnunina kemur fram að Ágústa hafi höfuðkúpubrotnað, kinnbeinsbrotnað og hlotið slæmt hryggbrot. Þá skaddaðist hún á mænu svo hún er mikið lömuð frá brjósti. Ágústa er komin úr öndunarvél og getur tjáð sig við fjölskyldu sína.

„Ljóst er að hún á langa og erfiða baráttu fyrir höndum sem auk þess að taka á líkamlega og andlega, mun reynast fjölskyldunni fjárhagslega erfið.

Margt smátt gerir eitt stórt og því hefur verið stofnaður styrktarreikningur fyrir Ágústu Örnu til þess að aðstoða hana og fjölskyldu hennar í þeirri baráttu sem framundan er.

Reikningsnúmerið er 0325-13-110203 og er kennitala hennar 270486-3209. Reikningurinn er hjá Arion banka og mun Róbert Sverrisson, viðskiptafræðingur hjá bankanum, vera fjármálastjóri söfnunarinnar,“ segir á vef Sunnlenska.