Íslenskur utangarðsmaður í Köben: Eignaðist í fyrsta sinn á ævinni heimili og innbú með hjálp samlanda sinna

Facebook-hópurinn Íslendingar í Kaupmannahöfn hefur að undanförnu verið vettvangur einstaks góðverks þar sem notendur hópsins hafa safnað saman heilu innbúi fyrir íslenskan utangarðsmann í Kaupmannahöfn. Það var Björg Magnúsdóttir nokkur sem birti færslu á síðunni þar sem hún auglýsir eftir húsgögnum og slíku fyrir manninn sem hefur verið skjólstæðingur hennar um árabil. Hún vill vernda hans einkalíf og nefnir hann því ekki á nafn.

„Hann átti ekkert, er á örorkubótum í Danmörku sem eru um 120 þúsund krónur íslenskar á mánuði og áttatíu prósent af því fer í húsaleigu,“ útskýrir Björg en maðurinn eignaðist í fyrsta sinn á ævinni sitt eigið heimili fyrir tveimur mánuðum. Björg segir félagsráðgjafa í Danmörku hafa barist fyrir því í tvö ár að maðurinn fengi félagslegt húsnæði en hann hefur búið á utangarðsmannaheimili í sjö ár. Björg kynntist manninum þegar hann kom inn á utangarðsmannaheimilið en hún var kölluð til sem túlkur fyrir hann.

Yndislegur maður

„Hann er mjög sérstakur, ólíkur öllum sem ég hef túlkað fyrir í gegnum tíðina sem eru svona fimmtíu til sextíu manns. Ég þurfti að stilla mig inn á hann tungumálalega séð, ég gat ekki verið eins formleg og ég er vanalega þegar kemur að túlkuninni.“ 

Björg útskýrir að maðurinn hafi takmarkaðan orðaforða á íslensku og tali litla sem enga dönsku. Hún náði sérstöku sambandi við manninn og hefur því síðastliðin sjö ár túlkað fyrir hann. 

„Síðustu tvö árin höfum við hist mjög oft. Hann er svo ljúfur, hugnæmur, auðmjúkur og þakklátur. Alveg yndislegur. Félagsfræðingarnir hér hafa gert allt til að koma honum inn í kerfið hér svo hann gæti fengið íbúð á vegum hins opinbera en það er mjög erfitt að fá íbúð.“ 

Maðurinn fékk íbúð á besta stað eftir baráttu félagsráðgjafa en hún er staðsett í Frederiksberg sem telst til fínni hverfa í höfuðborginni. Það var svo fyrir rúmlega tveimur mánuðum eins og fyrr segir sem hann fékk loks íbúð en í henni var ekkert fyrir utan ísskáp og eldavél. „Ég átti eldhúsborð, eldhússtóla og eldhúsinnbú,“ útskýrir Björg. 

„Einhver hafði reddað honum örþunnri dýnu sem hann svaf á og svo er svolítið fyndið að segja frá því að hann á playstation leikjatölvu og sjónvarp sem hann hafði keypt sér fyrir peninga sem hann fékk úr skattinum. Þetta sextíu og fjögurra ára gamla barn situr alla daga og spilar GTA tölvuleik,“ segir Björg og hlær. Annað átti maðurinn ekki. 

Björg biðlaði því til Íslendinga í Kaupmannahöfn á Facebook og viðbrögðin létu ekki á sér standa. Mörg hundruð manns létu sér líka við færsluna, fjölmargir buðust til þess að gefa húsgögn og annað dót og Björg segist hafa fengið allt að 150 einkaskilaboð þar sem fólk forvitnast um hagi mannsins. Í dag var svo stóri flutningadagurinn þar sem allt það dót og þau húsgögn sem fólk hafði boðist til að gefa var flutt inn á heimili mannsins. 

Hefur verið á götunni allt sitt líf

Í dag bárust svo þær gleðifréttir að vegna umfjöllunarinnar í Facebook hópnum hefur fólk úr fortíð mannsins sem vissi ekki um afdrif hans sett sig í samband við Björgu og fengið upplýsingar um sinn týnda vin. „Sem aukabónus í þetta frábæra upplifelsi hafa fjölskyldumeðlimir skjólstæðings míns fundið hann vegna þeirra skrifa sem hafa verið í vikunni. Hann er mjög hamingjusamur með það og er tilbúinn til og hlakkar til þess að taka þráðinn upp að nýju,“ skrifaði Björg inn á Facebook-hópinn í dag. Ein þeirra segist ætla að fara til konungsveldisins og heimsækja manninn í nýju íbúðina. 

Maðurinn hefur verið á götunni allt sitt líf. Hann gekk í skóla til þrettán ára aldurs en hætti þá og fór á sjó. Hann hefur síðan ekki átt fast aðsetur. Maðurinn er illa farinn líkamlega og andlega af eiturlyfjaneyslu en hann hætti ofneyslu eiturlyfja fyrir um tíu árum síðan. 

„Nú er hann laus við áfengis- og vímuefnavandann,“ segir Björg. Maðurinn er alveg óvinnufær en er að læra á alls kyns hversdagslega hluti svosem að fara í pósthúsið, í apótekið og slíkt með hjálp félagsráðgjafa. Þá hefur hann skráð sig sem þátttakandi í úrræði fyrir utangarðsmenn sem snýr að líkamsrækt. „Þetta er svo yndislegt, ég fæ tárin í augun,“ segir Björg. 

„Hann var svo hamingjusamur þegar hann tók upp hlutina og sagðist aldrei hafa átt svona fallega hluti. Hann var svo innilega þakklátur.“