Dæmdur í fangelsi fyrir gróft ofbeldi gegn eiginkonu sinni

Hæstiréttur dæmdi á miðvikudaginn karlmann í sex mánaða fangelsi, þar af þrjá mánuði skilorðsbundna, fyrir líkamsárás gegn eiginkonu sinni. Áður hafði Héraðsdómur Reykjavíkur dæmt manninn í þriggja mánaða skilorðsbundið fangelsi en Hæstiréttur mat það manninum til refsiþyngingar „að hann hefði ráðist að eiginkonu sinni á grófan hátt á heimili þeirra og ætti hann sér engar málsbætur.“

Rétturinn leit síðan til þess að óútskýrður dráttur hefði orðið á rannsókn málsins og var hluti refsingarinnar því skilorðsbundinn.

Maðurinn var dæmdur fyrir að hafa „annars vegar dregið eiginkonu sína inn á baðherberg heimilis þeirra, reynt að ýta höfði hennar í klósett, hótað henni með hníf og kastað honum á eftir henni er hún flýði út af heimili þeirra.“ Þá var maðurinn einnig dæmdur fyrir að hafa veist að konunni með ofbeldi og hótunum þar sem hún lá inni í hjónaherbergi með ungan son þeirra.

Fyrra brot mannsins átti sér stað í ágúst árið 2012 og hið síðara ári síðar, í ágúst 2013. Ákæra var hins vegar ekki gefin út fyrr en í janúar 2015 og endanlega ekki dæmt í málinu fyrr en nú en dráttur á málinu er óútskýrður samkvæmt dómi Hæstaréttar sem má lesa í heild sinni hér.