Færri heimilisofbeldismál felld niður

Mun færri rannsóknir á heimilisofbeldi á Suðurnesjum eru felldar niður nú en áður. Hlutfall mála þar sem rannsókn var hætt fækkaði úr 94 prósentum árið 2010 í þrjú prósent árið 2015.

Þetta kemur fram í tilkynningu frá Reykjanesbæ. Þar segir að það sem meðal annars þótti til bóta hafi verið að fólk geti nú leitað til annarra einstaklinga en lögreglu, en félagsþjónustur sveitarfélaganna komu að 42 málum af 62 á síðasta ári.

Þá segir að mál fái nú meiri framgang innan réttarvörslukerfisins. Alls hafi 28 dómar fallið í heimilisofbeldismálum á Suðurnesjum á árunum 2011-2014. Haft er eftir Skúla Jónssyni og Jóhannesi Jenssyni hjá lögreglunni á Suðurnesjum að árið 2010 hafi rannsóknum verið hætt í 17 af þeim 18 málum sem komu til kasta lögreglu, strax hjá rannsóknardeild. Árið 2015 hafi þetta hlutfall verið komið niður í tvö mál.

Hæsta hlutfall heimilisofbeldis utan höfuðborgarsvæðisins

Þeir segja nokkrar sveiflur hafa verið í málafjölda undanfarin ár en betri skráning hjá lögreglu og aukin tiltrú almennings á verklagi séu hugsanlegar skýringar á því. Um átta prósent þeirra heimilisofbeldismála sem koma á borð lögreglu á landinu eiga sér stað á Suðurnesjum en íbúafjöldinn er um sjö prósent af heildaríbúafjöldanum. Að sögn Skúla og Jóhannesar er umdæmi lögreglunnar á Suðurnesjum með hæsta hlutfall þessara mála utan höfuðborgarsvæðisins.

„Verklagið hjá okkur gengur út á „að halda glugganum opnum“ eins lengi og þörf krefur. Það þýðir að lögregla, barnaverndar- og félagsmálayfirvöld komi að málum, afli eins mikilla upplýsinga og unnt er, bjóði stuðning og kynni bæði brotaþolum og gerendum þau úrræði sem eru í boði, strax í upphafi máls. Þá er málum fylgt eftir, annars vegar með sambandi félagsþjónustu við brotaþola innan þriggja daga frá atburði og síðan með heimsókn lögreglu og félagsþjónustu að jafnaði innan viku frá atburði. Þessi aðferðafræði hefur almennt mælst vel fyrir hjá brotaþolum sem telja sig fá meiri stuðning og ráðgjöf en áður,“ segir þeir í tilkynningunni.