Blindir renndu sér á skíðum í Skálafelli

Það var líf og fjör í Skálafelli í dag þar sem blind og sjónskert börn skíðuðu niður brekkurnar með aðstoð kennara. Þau létu litla reynslu ekki stoppa sig og nutu hraðans sem fylgir skíðunum.

Tíu ungmenni á aldrinum 11 til 22 ára voru í hópnum en ferðin var á vegum Blindrafélagsins. „Þetta byggist aðallega bara á því að treysta þjálfaranum og það bara gengur allavega hjá mér bara mjög vel,“ segir Már Gunnarsson einn af þeim sem var með í dag. Már, sem er fjórtán ára, hefur aðeins tvisvar sinnum áður farið á skíði og naut hann þess sérstaklega hversu hratt hann fer yfir á skíðunum.

Jón Norðkvist skíðakennari segir kennslu sem þessa snúast fyrst og fremst um traust. Hann skíðaði fyrir aftan Má í dag og notaði fjögur orð til að hjálpa honum niður það eru hægri, vinstri, rennsli og stopp. Nokkur þoka var á svæðinu í dag og leist kennurunum ekki á blikuna þegar upp var komið þar sem þeir sáu lítið frá sér. Már kunni þó svör við því og sagðist geta hjálpað þeim niður þar sem hann þekkir slíkt vel.