Vika er langur tími í pólitík

Atburðarás síðustu daga í forsetaframboðsmálum hefur verið lyginni líkust. Í þessu myndbandi hér að ofan rifjar Vísir upp hina ýmsu snúninga og óvæntar uppákomur í kringum baráttuna um Bessastaði, frá fimmtudeginum 5. maí til dagsins í dag.

Á forsíðu Fréttablaðsins þann 5. maí, á uppstigningardag, birtist frétt þess efnis að Guðni Th. Jóhannesson sagnfræðingur og Ólafur Ragnar Grímsson forseti nytu sambærilegs stuðnings fyrir forsetakosningarnar sem fram fara þann 25. júní.

Á þeim tíma hafði Guðni Th. ekki tilkynnt formlega um framboð en það gerði hann hins vegar síðar sama dag í Salnum í Kópavogi.

Örfáum klukkustundum síðar sendi forsetaskrifstofa tilkynningu, á ensku, frá Dorrit Moussaieff forsetafrú þar sem hún hafnaði öllum tengslum við aflandsfélög. Fjármál Dorritar og fjölskyldu hennar höfðu verið mikið til umræðu eftir að fyrirtæki þeirra fundust í Panama-skjölunum svokölluðu.

Þrátt fyrir ítrekaðar tilraunir fréttastofu vildi Ólafur Ragnar ekki tjá sig föstudaginn 6. maí en þá var forseti að eigin sögn þjakaður af flensu. Daginn eftir gaf hann hinsvegar kvöldfréttum Stöðvar 2 tiltölulega óljós svör um framtíð kosningabaráttu sinnar.

Tíst Páls blés lífi í orðóma

Varð það til þess að ýmsar sögusagnir fóru á kreik um hvort hann hygðist yfirhöfuð halda framboði sínu til streitu. Ekki minnkaði pískrið þegar Páll Magnússon, stjórnandi útvarpsþáttarins Sprengisands, sagði á Twitter-síðu sinni að hann hefði þurft að gera breytingar á dagskrá þáttarins sem fyrirhugaður var morguninn eftir.

Það var svo á ellefta tímanum daginn eftir, sunnudaginn 8. maí, sem Davíð Oddsson tilkynnti um framboð sitt til forseta. Að kvöldi sama dags sagði Ólafur Ragnar að forsendurnar fyrir framboði sínu, sem hann hafði tilkynnt rúmlega hálfum mánuði áður, væru nú breyttar.

Atburðarás mánudagsins var engu hægari. Könnun MMR leiddi í ljós að Guðni Th. nyti stuðnings 59,2% aðspurðra og að stuðningur við Ólaf Ragnar hefði minnkað um helming. Um 20 mínútum eftir að niðurstöður könnunarinnar höfðu verið birtar sendi Ólafur Ragnar frá sér tilkynningu þar sem hann sagði að hann væri endanlega hættur við að bjóða sig fram til endurkjörs.

Könnun fréttastofu 365, sem prýddi forsíðu Fréttablaðsins í gær, gaf svo til kynna tæplega 70% fylgi Guðna Th. og að rúmlega 13 prósent hygðust kjósa Davíð Oddsson. Andri Snær Magnason mældist í sömu könnun með um 11 prósent stuðning. Aðrir frambjóðendur nutu minni stuðnings.