Í sömu fötunum í rúmt ár

Fyrir rétt rúmu ári síðan ákvað Júlíanna Ósk Hafberg að prófa að klæðast sömu fötunum í heilan mánuð. Síðan er liðið rúmt ár og Júlíanna hefur enn ekki skipt um föt.

„Þetta var fyrst og fremst út frá umhverfissjónarmiði sem ég ákvað að prófa þetta. En ég vildi líka kanna viðbrögð samfélagsins, hvort fólk kippti sér upp við þetta eða tæki yfir höfuð eftir þessu. Það eru óskrifaðar reglur í samfélaginu að við megum ekki vera of mikið í sömu fötunum. Það má til dæmis ekki fara í sama kjólnum á tvær árshátíðir í röð, finnst manni. Þetta er svo brenglað og mig langaði að ýta aðeins við þessu," segir Júlíana.

Hún keypti sér tvær eins skyrtur í versluninni Monki og hefur við hana klæðst sama jakkanum og sömu skónum í heilt ár. Buxurnar sem hún lagði upp með dugðu skammt svo þá fór hún í fataskápinn sinn og klæðist buxum sem hún átti fyrir.

En hvernig hefur gengið að klæðast sömu flíkinni í heilt ár? Slitna flíkurnar ekki eða koma á þær blettir?

„Jú það hefur auðvitað gengið á ýmsu. Ég reif gat á aðra skyrtuna mína og svo brenndi stelpa óvart gat á hina með sígarettu. Ég þarf bara að vera fljót að hugsa, laga flíkurnar og hugsa vel um þær. Það hafa auðvitað komið fullt af blettum á skyrturnar sem ég hef bara þurft að ná úr, og það hefur bara gengið."

Júlíanna er á lokaári á fatahönnunarbraut í Listaháskóla Íslands. Endingargóð föt sem geta nýst vel og lengi var leiðarljós hennar í lokaverkefninu við skólann. Hún segist ekki vera búin að ákveða hvenær hún skipti um föt.

„Þetta er búið að breyta mér og öllu mínu neyslumynstri. Ég mun allavega ekki fara til baka eins og ég var hvað varðar fatainnkaup," segir Júlíanna.

Áhugasamir geta fylgst með tilraun Júlíönnu á bloggsíðu hennar, jhafberg.blogspot.is.