Svara ekki hvort fleiri eignir hafi verið keyptar af stjórnarmönnum

Kvika vill ekki tjá sig um hvort bankinn hafi keypt fleiri eignir af stjórnarmönnum bankans eða eigendum hans, samkvæmt svari við fyrirspurn fréttastofu. Vísir sagði frá því í gær að bankinn hefði keypt jeppabifreið af Skúla Mogensen, einum stærsta einstaka eiganda bankans, árið 2011. 

Bankinn ætlar ekki heldur að svara spurningum um hvort kaupin hafi verið borin undir stjórn bankans, en samkvæmt upplýsingum fréttastofu var Þorsteinn Pálsson stjórnarformaður meðvitaður um kaupin og augljóslega Skúli sjálfur, sem var varaformaður stjórnar bankans.

Sigurður Atli Jónsson, bankastjóri Kviku, vildi ekki tjá sig um málið í samtali við fréttastofu í gær og sagðist þurfa að skoða málið. Í dag barst fréttastofu svo skriflegt svar þar sem fram kom að bankinn hefði ákveðið að svara ekki spurningum fréttastofu.