Hægt að senda inn umsagnir um lög um fóstureyðingar

Á vef velferðarráðuneytisins er að finna tilkynningu frá nefnd sem hefur það hlutverk að endurskoða lög um ráðgjöf og fræðslu varðandi kynlíf og barneignir og um fóstureyðingar og ófrjósemisaðgerðir.

Óskað er eftir umsögnum og tillögum að breytingum á gildandi löggjöf frá þeim sem láta sig efni laganna varða og telja þörf fyrir breytingar.

Yfirleitt er óskað samráðs hjá ákveðnum hagsmunaaðilum eftir að breytingartillaga hefur verið gerð. Hér er því um nýmæli að ræða.

„Við viljum hafa öll sjónarmið í huga þegar við hefjum vinnuna. Þetta eru viðkvæm mál sem margir hafa sterkar skoðanir á í sitthvora áttina. Við viljum bara fá sem flest sjónarmið,“ segir Þórunn Steinsdóttir, starfsmaður ráðuneytisins í nefndinni.

Nefndin var skipuð í byrjun mars og er verkefni hennar m.a. að endurskoða lög um fóstureyðingar sem eru frá 1975. Lögin hafa verið gagnrýnd fyrir að leyfa ekki frjálsar fóstureyðingar þar sem konur þurfa að ganga i gegnum sérstakt umsóknarferli þar sem tveir utanaðkomandi aðilar leggja mat á aðstæður og ástæður kvennanna. Í vikunni var til að mynda fundur um lögin þar sem Fríða Rós Valdimarsdóttir, formaður Kvenréttindafélags Íslands, var með erindi.

„Mat Kvenréttindafélagsins er að konum sé í raun ekki treyst til að taka ákvarðanir um eigin líkama og líf og því styður félagið ákvörðun heilbrigðisráðherra um að endurskoða lögin,“ segir Fríða Rós.

Þórunn segir að einnig verði endurskoðaðar greinar um ófrjósemisaðgerðir og kynfræðslu. „Við létum ákveðna aðila vita af umsagnarbeiðninni; t.a.m. heilbrigðisstéttir, félagsráðgjafa og siðfræðistofnun. Við tókum aftur á móti ákvörðun um að láta ekki trúfélög sérstaklega vita en þeim er frjálst að senda inn umsögn eins og öllum öðrum.“

Nefndin skilar skýrslu til ráðherra 1. nóvember. Þar verða tillögur að breytingum og úr því unnið frumvarp til breytinga.

Fréttin birtist fyrst í Fréttablaðinu 18. apríl.