Samdist við Rússa um þorsk

Ísland og Rússland undirrituðu á miðvikudag samning um veiðar íslenskra skipa í rússneskri lögsögu á árinu 2016 og munu Íslendingar samkvæmt honum geta veitt allt að 8.158 tonn af þorski.

Samningurinn byggir á Smugusamningnum, þríhliða samningi Íslands, Noregs og Rússlands frá árinu 1999 um veiðar á þorski í Smugunni. Ísland og Rússland semja árlega um veiðar hvers árs en á fundi í desember í fyrra náðist ekki að landa samningi.

Á fundinum kom fram að Rússar hafa áhuga á því að endurskoða ákveðin atriði í Smugusamningnum í aðdraganda mögulegrar endurskoðunar hans árið 2018. Jafnframt lýstu þeir yfir áhuga á því að auka samstarf milli þjóðanna á sjávar­útvegssviðinu.

Þessi grein birtist fyrst í Fréttablaðinu þann 20. apríl.