Einar og Össur með yngstu mönnum í anda og fjöri

Þingfundur hófst klukkan 15 í dag en við upphaf þingfundar óskaði Kristján L. Möller, 1. varaforseti þingsins, þeim Einari K. Guðfinnssyni, þingmanni Sjálfstæðisflokksins og forseta þingsins, og Össur Skarphéðinssyni, þingmanni Samfylkingarinnar, til hamingju með daginn þar sem í dag eru 25 ár síðan þeir voru fyrst kjörnir á þing.

Kristján hélt stutta tölu áður en hefðbundin dagskrá tók við og sagði meðal annars:

„25 ár eru langur tími í stjórnmálum og þeir eru ekki margir þingmenn í seinni tíð sem eiga svo langa setu á þingi. Forseti óskar „afmælisbörnum“ dagsins, ef svo má segja, til hamingju með langan og farsælan þingmennskuferil. Og þrátt fyrir langan feril eru þeir hv. þingmenn Einar K. Guðfinnsson og Össur Skarphéðinsson — eins og allir vita — með yngstu mönnum hér, að minnsta kosti í anda og fjöri svo ekki sé meira sagt.“

Eins og kunnugt er ætlar Einar ekki að gefa kost á sér áfram sem þingmaður þegar þessu kjörtímabili lýkur en kosningar munu fara fram í haust.