Lögregla þarf ekki að afhenda farsíma með meintum nektarmyndum

Lögreglan á Suðurnesjum þarf ekki að afhenda karlmanni, sem grunaður er um að hafa ætlað að birta nektarmyndir af fyrrum unnustu sinni, farsíma hans, samkvæmt úrskurði Hæstaréttar frá því í dag. Dómurinn telur hins vegar aðfinnsluvert að lögregla hafi rannsakað efnisinnihald farsímans án þess að fyrir liggi samþykki mannsins eða dómsúrskurður.

Maðurinn var handtekinn 18. mars síðastliðinn vegna gruns um að hafa hótað konunni að birta nektarmyndir af henni opinberlega. Parið hafði, á tímabilinu 2014 til 2015, skipst á ljósmyndum, að því er segir í greinargerð með dómnum.

Konan greindi lögreglu frá því að maðurinn hefði reglulega haft í hótunum við hana um að birta opinberlega þær myndir sem hann hafi átt af henni og þá hafi hann gefið til kynna með ýmsum hætti að hann hafi þá þegar birt af henni ljósmyndirnar.

Farsími mannsins var haldlagður við handtökuna í mars. Maðurinn neitaði þó að upplýsa lögreglu um aðgangsorð símans en lögreglu tókst að komast „fram hjá læsingum símans“ og fyrir liggur að hún hafi þegar hlaðið niður og að hluta rannsakað efnisinnihald símans.

Hæstiréttur féllst á að upplýsingar og gögn í símanum gætu haft sönnunargildi og skipt miklu fyrir rannsókn málsins. Aftur á móti hafi lögreglan brotið gegn friðhelgi einkalífs mannsins með því að rannsaka efni farsíma hans án þess að fyrir lægi dómsúrskurður um þá aðgerð. Taldi Hæstiréttur rannsókn lögreglu að því leyti aðfinnsluverða.