Bændur skoða misneytingu á verkafólki

„Í ljósi nýrra frétta er nauðsynlegt að fara betur yfir þessi mál,“ segir Sindri Sigurgeirsson, formaður Bændasamtakanna, um mál Zsofíu Sidlovits sem fékk greiddar 40-60 þúsund krónur á mánuði fyrir allt að tvö hundruð tíma vinnu. Zsófía vann frá júnímánuði 2015 til febrúar 2016 án ráðningarsamnings. Báran stéttarfélag aflar gagna í máli hennar og mun gera kröfu á húsráðendur á Fjalli I þar sem Zsofía vann.

„Bændasamtökin hafa haft umsjón með kjarasamningum verkafólks í landbúnaði með Starfsgreinasambandinu frá 2011 og eru þeir samningar aðgengilegir á vef okkar. Það er alvarlegt mál ef ekki er farið eftir þeim og ef brotið er á rétti verkafólks,“ segir Sindri og segir Bændasamtökin leggja áherslu á að farið sé eftir þeim lögum og reglum sem gilda í þessum efnum.

Drífa Snædal, hjá Starfsgreinasambandi Íslands, tekur undir með Sindra og segir baráttu gegn óviðunandi vinnuaðstæðum, óskráðu fólki og launum undir kjarasamningum fara vaxandi hjá verkalýðshreyfingunni. „Við verðum að treysta á almenning, samstarfsfélaga og fleiri að hjálpa okkur í þessari baráttu. Þetta má ekki líða og ég held að enginn vilji samfélag þar sem svona þrífst. Þetta er því hagsmunamál okkar allra,“ segir Drífa.