Vill að skattagögn verði sótt inn í íslensku bankana

Helgi Hjörvar, þingflokksformaður Samfylkingarinnar, vill að skattagögn verði sótt inn í íslensku bankana. Kosta þurfi kapps við að ná öllum þeim upplýsingum sem til séu um þá sem hafi skotið sér undan sköttum og skyldum.

„Það er bara þannig að upplýsingar um það hverjir sendu peningar út á þessar eyjar eru að finna í bönkunum okkar hér heima,“ sagði Helgi Hjörvar á Alþingi í dag. Þá spurði hann Bjarna Benediktsson fjármálaráðherra hvort rétt sé að hann sé í fyrirsvari í umræðum um viðbrögð stjórnvalda við skattaskjólum, sem og hvort Bjarni hyggist beita sér eitthvað í skattaskjólsmálum.

„Mér finnst menn slá dálítið úr og í varðandi hvert verkefnið er. Menn vilja taka umræðuna á mjög breiðum grundvelli. Menn vilja setja á sömu hilluna þá sem hafa gert hreint fyrir sínum dyrum, hafa ekkert að fela, hafa fylgt íslenskum lögum og reglum og hinna sem eru að fela sig og reyna að komast undan sanngjarnri skattlagningu. Þetta finnst mér ómerkilegt, ég ætla bara að taka það fram,“ sagði Bjarni Benediktsson.

Fyrr í umræðunum hafði hann greint frá því að stjórnvöld hefðu, og myndu áfram, beita sér í þessum málum. „Ég tek undir að þingið verður að sjálfsögðu að bregðast við því ákalli sem er skýrt um að stjórnvöld taki á þeim vanda sem um er að ræða, skattsvikunum, alvarlega og hyggist bregðast við,“ sagði Bjarni.