Blaðamaður BuzzFeed hraunar yfir leyndan kostnað WOW Air

Fyrir skemmstu hóf WOW Air að auglýsa ódýr flug frá Bandaríkjunum til Evrópu. Meðal annars frá Washington til Íslands fyrir 99 dollara, tæpar 13.000 krónur, eða San Francisco til Parísar, með millilendingu í Keflavík, fyrir 149 dollara, tæpar 20.000 krónur. Blaðamaður BuzzFeed hélt að þetta hlytu að vera verð sem væru of góð til að vera sönn og ákvað að gera athugun á því.

„Ég bý í Kaliforníu og horfði á tvöhundruð dollara flugmiða (rúmar 26.000 krónur íslenskar) frá vesturströndinni til Evrópu. Það er ekki neitt,“ skrifar Nicole Nguyen. „Ég komst fljótt að því WOW kemur fyrir ýmsum gjöldum til fá þig til að trúa að þú sért að fá frábært verð. Þetta er eins og að fá sér ódýrt frosið jógúrt sem endar svo á því að kosta meira en venjulegur af því að öll kurlin eru svo dýr.“

Nicole bendir á að það kosti til að mynda tvöhundruð dollara að fara frá San Francisco til Frankfurt sem sé hlægilega ódýrt. Það að koma sér til baka hins vegar sé að minnsta kosti tvöfalt dýrara. Ódýrasta flugið til baka kosti 409 dollara. „Hvað um það, 608 dollarar til Evrópu og til baka er ennþá frábært, ekki satt? Nei,“ skrifar Nicole.

Blaðamaðurinn komst að því að allur handfarangur þyngri en tólf kílógrömm kostar 57 dollara (7.500 krónur) aukalega. Aðeins er ein handfarangurtaska leyfð á mann. Hver taska sem er innrituð kostar síðan 76 dollara (9.900 krónur) til viðbótar. Að auki séu sætin misdýr eftir því hvar í flugvélinni þau eru staðsett.

„Þannig að þegar allt kemur til alls endarðu á því að kaupa flug fyrir hátt í þúsund dollara þegar þú hélst að það myndi kosta tvöhundruð dollara. Varið ykkur á alls kyns leyndum kostnaði,“ skrifar Nicole.