Óvíst að takist að klára um helgina

Mörg erfið mál eru enn óleyst í kjaraviðræðum SFR, Sjúkraliðafélagsins og lögreglumanna við samninganefnd ríkisins þótt nokkur skriður hafi verið á viðræðum, að sögn Árna Stefáns Jónssonar, formanns SFR.

Í viðtali við fréttastofu sagði Árni Stefán óvíst að nýir kjarasamningar verði undirritaðir um helgina, þótt samkomulagi sé náð um grundvallaratriði og kostnaðarramma í nýjum samningum. Þung sérmál séu eftir, svo sem varðandi vaktavinnu og fleiri þætti. 

„Þetta hefur gengið upp og ofan síðustu daga,“ segir hann. Í fyrradag hafi viðræður gengið fremur hægt framan af degi en svo tekið við sér seinni partinn og í gær hafi verið samstaða um að hafa „góðan skrið“ á viðræðunum. „En hvort þeir klárast núna um helgina er erfitt um að segja.“

Fundað hefur verið daglega frá því að verkfallsaðgerðir SLFÍ og SRF hófust fyrir rúmri viku.

Lögreglumenn hafa ekki verkfallsrétt en hafa tekið þátt í mótmælum og samstöðufundum verkalýðsfélaganna þriggja sem saman standa að viðræðunum við ríkið. Félögin eru stærstu aðildarfélög BSRB og má gera ráð fyrir því að samningur þeirra verði sá grunnur sem samningar annarra félaga við ríkið komi til með að byggja á.

Félagar í stéttarfélögunum komu saman við Stjórnarráðshúsið við Lækjargötu í Reykjavík í gærmorgun í þeirri trú að þar færi fram ríkisstjórnarfundur eins og venja er á föstudögum. Honum hafði hins vegar verið frestað vegna landsfundar Sjálfstæðisflokksins sem hófst í gær.

Af þeim sökum var boðað til annarra mótmæla við Laugardalshöll síðdegis á meðan Bjarni Benediktsson, fjármálaráðherra og formaður Sjálfstæðisflokksins, flutti þar innandyra opnunarræðu landsfundarins.