Telja að um hryðjuverk hafi verið að ræða

Flugsérfræðingar telja nær öruggt að flugslysið á Sinæ skaga um helgina megi rekja til hryðjuverka. Allir um borð, 224 einstaklingar, létu lífið þegar vélin fórst og er um að ræða mannskæðasta flugslys í sögu Rússlands.

Fréttamiðillinn The Telegraph hefur eftir Michel Polacco flugsérfræðingi að vélin hafi sundrast í háloftunum. Líklega hafi einhvers konar sprenging átt sér stað – það megi rekja til tæknilegra örðugleika, sem þó sé afar ólíklegt. Þá hefur flugfélagið sjálft, Kogalymavia, lýst því yfir að slysið megi rekja til „utanaðkomandi aðstæðna“. Það sé eina eðlilega skýringin að sögn framkvæmdastjóra félagsins.

Flugriti vélarinnar er fundinn og er rannsókn enn í fullum gangi. Rússnesk yfirvöld hafa ekki útilokað að um hryðjuverk hafi verið að ræða, en ISIS samtökin hafa þegar lýst ábyrgð á atvikinu. Rússar draga það þó í efa og segja samtökin ekki búa yfir vopnum sem gætu grandað vél í svo mikilli hæð.

Lík 144 fórnarlamba voru flutt til Pétursborgar í Rússlandi nú um helgina.