Gerðardómur mun hafa áhrif á kjaraviðræður VM

Guðmundur Ragnarsson, formaður Félags vélstjóra og málmtæknimanna gerir ráð fyrir því að úrskurður Gerðardóms í kjaradeilu ríkisins við Bandalags háskólamanna og Félags íslenskra hjúkrunarfræðinga muni hafa áhrif á kjaradeilu VM við Samtök atvinnulífsins.

„Auðvitað munum við horfa til úrskurðar Gerðardóms í viðræðum okkar við vinnuveitendur. Í mínum huga er mörgum stórum spurningum ósvarað, það er að segja hvaða hópum á að skammta hækkanir og hverjum ekki. Samkvæmt úrskurði gerðardóms eru samningarnir afturvirkir, ekki var samið um slíkt á almennum vinnumarkaði. Þessi úrskurður hefur klárlega áhrif á komandi kjaraviðræður.“

Félagsmenn í Félagi vélstjóra og málmiðnarmanna hafa fellt almenna kjarasamninga í tvígang, síðast í júlí sl. Viðræður vegna kjarasamninga við Samtök atvinnulífsins eru hafnar hjá sáttasemjara. Guðmundur segir að félagsmenn séu mjög óánægðir með kjör sín og rekja megi skort á endurnýjun í geiranum til lélegra kjara.

„Atvinnurekendur verða að taka tillit til þess að samningar hafa ítrekað verið felldir og nú síðast með mjög afgerandi hætti. Það hefur verið viðvarandi skortur á fólki í vél og málmtæknigreinum og unga fólkið fer ekki í þessar greinar. Helsta ástæðan er að mínu viti kjörin sem bjóðast.“