Anna Birta stóðst skyggnilýsingapróf upp á hundrað

„Það er til fólk sem er að svindla í þessu eins og í öllu, það er til fólk sem er að stela og það er til fólk sem er óheiðarlegt. Það er alls staðar og líka í þessum geira,“ segir Magnús Már Harðarson, forseti Sálarrannsóknarfélags Íslands.

Á mánudag vakti athygli viðtal á Stöð 2 á milli Frosta Logasonar fjölmiðlamanns og Önnu Birtu Lionaraki vegna skyggnilýsingafunds sem Anna hélt á sunnudag. Þar sakaði Frosti Önnu meðal annars um að vera svikamiðill og nýta sér neyð fólks.

„Við hjá Sálarrannsóknarfélaginu prófuðum Önnu mjög nákvæmlega og hún stóðst öll próf alveg upp á hundrað,“ segir Magnús.

Að sögn Magnúsar fara prófin þannig fram að hlutlaus miðill er fenginn til að meta miðilsgáfu umsækjanda. Þá setjist stjórn félagsins niður með viðkomandi og biðji um skyggnilýsingu. Anna hafi staðist hans viðmið, sem felst í því að geta sagt honum eitthvað sem enginn veit nema hann.

Magnús segir að fólk sem ekki geti haft samband við handanheim guggni á prófi félagsins.

„Þeir vita eins og er að þeir munu ekki standast það. Svo er annað í þessu sem er mjög algengt, að fólk er með hæfileika en ekki nógu mikinn hæfileika. Það eru ekki allir eins og Víkingur Heiðar Ólafsson, en spila á píanó engu að síður.“

Bryndís Emilsdóttir miðill segist ekki þekkja miðla sem vinni af óheilindum. Hún segir að efahyggjufólk geti borið með sér neikvæða orku sem hafi áhrif á skyggnilýsinguna.

Jóhann Björnsson, heimspekingur og formaður Siðmenntar, segir siðferðileg álitaefni um miðla togast á, annars vegar hvort það eigi að segja satt og rétt frá og hins vegar hvað lætur fólki líða vel.

„Ég hef efasemdir um að það sé rétt að fara með ósannindi beinlínis til að láta fólki líða vel. Varðandi dáið fólk og dauðann þá myndi ég halda að það væri farsælast að fólk horfist í augu við að lífið er bara frá fæðingu til dauða,“ segir Jóhann.

Siðferðilegar spurningar eru knýjandi þegar peningar eru teknir fyrir skyggnilýsingar segir Jóhann.

„Það er sérstaklega alvarlegt ef fólk hefur ekkert fyrir sér í þessu og er að rukka fyrir þetta því þá eru það bara hrein og klár svik,“ segir Jóhann Björnsson.