Fækkun útibúa heldur áfram um land allt

Að óbreyttu mun bankaútibúum hér á landi fækka um 8 á þessu ári. Þá verða útibúin 87 en þau voru 152 árið 2008 og hefur því fækkað um 43 prósent.

Á sama tíma hefur heimsóknum í heimabanka fjölgað hratt. Landsbankinn bendir á að yfir 80 prósent bankaviðskipta séu orðin rafræn og hlutfallið fari hækkandi.

Heimsóknir í netbanka Landsbankans hafa verið 11 sinnum fleiri en heimsóknir í útibú árið 2012 en á síðasta ári voru heimsóknirnar orðnar 20 sinnum fleiri.

Heimsóknum til gjaldkera hefur aftur á móti fækkað um fjórðung milli áranna 2012 og 2014.

„Þetta vinnur saman, færri heimsóknir í útibú og fleiri heimsóknir í netbanka,“ segir Helgi Teitur Helgason, framkvæmdastjóri Einstaklingasviðs Landsbankans. 

Hann bendir á að þróunin sé að eiga sér stað þrátt fyrir mikla fjölgun erlendra ferðamanna hér á landi.

Opnunartími margra útibúa hefur einnig verið styttur og starfsmönnum fækkað. Landsbankinn tilkynnti í nóvember að útibú bankans í Seyðisfirði yrði fært í húsakynni sýslumannsins, opnunartími yrði styttur og starfsmönnum yrði fækkað úr þremur í einn.

Helgi segir að heimsóknir í viku hverri í fámennustu byggðarlögum þar sem Landsbankinn rekur afgreiðslur hlaupi á nokkrum tugum. „ Kannski niður í tvo til þrjá tugi,“ segir Helgi.

Í sumum bæjarfélögum hafi þjónustuheimsóknir tekið við hlutverki útibúa sem helst sinni þörfum eldri viðskiptavina.

Helgi telur þó enn að útibú gegni mikilvægu hlutverki. „Það er ekki hægt að segja að útibúin séu dauð eða þau muni hverfa alveg.“

Viðskiptavinir vilji enn sækja ráðgjöf og upplýsingar í útibú þegar þeir séu að taka stórar ákvarðanir, til að mynda taka húsnæðislán.