Olíuverð fellur á ný

Olíuverð féll á ný í gær eftir tæplega 20 prósenta hækkun dagana á undan. Verð á Brent hráolíu féll um 5,5 prósent og kostaði rúma 54 dollara við lokun markaða í gær. Olíuafurðir sem fluttar eru inn til Íslands eru unnar úr Brent hráolíu.

Þá féll verð á bandarískri hráolíu um 9 prósent í gær.

Sjá einnig:Olíuverð tekur kipp: 20 prósenta hækkun á þremur dögum

Verð á hráolíu hækkaði á þriðjudag vegna væntinga markaðsaðila um að kínverski seðlabankinn myndi dæla fé inn í hagkerfi landsins sem myndi auka eftirspurn á olíu segir í frétt Reuters. Þá höfðu væntingar um að dregið yrði úr olíuframleiðslu í Bandaríkjunum einnig áhrif á verðið til hækkunar.

Olíuverð hefur mikil áhrif hér á landi. Í Peningamálum Seðlabanka Íslands sem komu út í gær kom fram að lækkun olíuverðs hefði jákvæð áhrif á hagvöxt og vöruskiptajöfnuð og drægi úr verðbólgu.