Stjörnukonur í hverjum spennuleiknum á fætur öðrum

Nýliðar Stjörnunnar hafa kannski bara unnið einn af fyrstu fimm leikjum sínum í Domino´s deild kvenna í körfubolta en Stjörnukonur hafa engu að síður komið með mikla spennu inn í deildina í byrjun tímabilsins.

Stjarnan er með í efstu deild kvenna í fyrsta sinn í vetur en liðið tryggði sér sætið með því að slá út Njarðvík í úrslitkeppni 1. deildar síðasta vor.

Stjörnuliðið tapaði með þremur stigum á móti Val í framlengdum leik í gær, 95-92, en þetta var annar leikur Stjörnunnar í röð sem tapast í framlengingu. Í leiknum á undan tapaði Stjörnuliðið með einu stigi í framlengdum leik í Grindavík 85-84.

Grindavík tryggði sér framlengingu á vítalínunni í leiknum á undan en í gær það voru Stjörnukonur sem tryggðu sér framlenginguna á móti Val í gær.  

Stjörnukonur fengu tækifæri til að vinna leikinn á móti Val í venjulegum leiktíma en ekkert kom út úr lokasókn liðsins alveg eins og þegar Stjörnukonur gátu unnið leikinn í lokasókninni í Grindavík.

Stjörnuliðið hefði síðan að öllu eðlilegu átt að fara í þriðju framlenginguna í fyrstu fimm umferðunum í leiknum á móti Snæfelli í Stykkishólmi í annarri umferð. Bryndís Guðmundsdóttir kom í veg fyrir það með magnaðri sigurkörfu en það var innan við sekúnda eftir þegar Snæfellsliðið átti innkast undir körfu Stjörnunnar.

Allir þessir þrír spennuleikir hafa tapast og það með aðeins samtals sex stigum. Fjórða tap Stjörnuliðsins kom síðan á móti toppliði Hauka í fyrstu umferðinni en Haukakonur hafa unnið alla fjóra leiki sína í deildinni.

Eini sigurinn hjá Stjörnunni til þessa í deildinni kom á móti Keflavík þar sem Stjarnan skoraði sjö síðustu stig leiksins og vann 78-68 eftir að hafa verið undir í byrjun fjórða leikhlutans.

Frammistaða liðsins hefur verið góð og þrátt fyrir að aðeins tvö stig séu í húsi er aðeins eitt lið í deildinni, Valur (85,5 stig í leik), búið að skora fleiri stig að meðaltali í leik. Stjörnukonur hafa skorað 84,4 stig að meðaltali í leik.



Fyrstu fimm leikir Stjörnunnar í efstu deild kvenna:

14. október: 11 stiga tap á móti Haukum (75-86)

17. október: 2 stiga tap á móti Snæfelli (84-85)

21. október: 10 stigar sigur á móti Keflavík (78-68)

24. október: 1 stigs tap í framlengingu á móti Grindavík (84-85)

28. október: 3 stiga tap í framlengingu á móti Val (92-95)