Síminn biðst velvirðingar á villandi auglýsingu

Síminn hefur beðist velvirðingar á framsetningu auglýsingar sinnar í kjölfar þess að Vodafone sendi Neytendastofu kvörtun vegna auglýsingar Símans.

Þar kvartaði Vodafone undan útvarpsauglýsingu Símans þar sem fullyrt var að Vodafone hefði slökkt á hliðrænum útsendingum RÚV og að 70,6% landsmanna segði Sjónvarp Símans standa helsta keppinautnum, Vodafone, framar.

Vodafone vildi meina að fullyrðingar í auglýsingunni hefðu verið rangar og villandi.

Í tilkynningu frá Símanum sem fylgdi í kjölfarið kemur fram að það hafi verið mistök að halda því fram að 70,6% landsmanna telji Sjónvarp Símans betra en sjónvarp Vodafone. Síminn segist heldur hafa átt að segja að 70,6% þeirra sem tóku afstöðu í könnun sem Síminn lét gera fyrir sig væru á þessari skoðun.

Síminn segist standa við yfirlýsingu sína um að Vodafone hafi lokað á hliðrænar útsendingar RÚV, enda hafi það komið fram á heimasíðu Vodafona.

Yfirlýsing Símans um málið er hér fyrir neðan:

Síminn hefur ákveðið að breyta framsetningu á einni auglýsingu um Sjónvarp Símans í kjöfar kvörtunar Vodafone. Í fyrirsögn auglýsingar Símans sagði 70,6% landsmanna velja Sjónvarp Símans. Réttara hefði verið að vísa til 70,6% þeirra sem tóku afstöðu. Biðjumst við velvirðingar á því. Síminn mun bregðast við þessari kvörtun með því að senda Neytendastofu skýringarnar.

Þjóðargátt Maskínu vann skoðanakönnunina fyrir Símann dagana 15.-22. desember síðastliðinn. Alls 818 á aldrinum 15-75 ára og af öllu landinu svöruðu netkönnuninni.​ Þeir sem annað hvort eru með Sjónvarp Símans eða Sjónvarp Vodafone voru spurðir: Hvort telur þú að Sjónvarp Símans eða Sjónvarp Vodafone standi almennt framar í sjónvarpsþjónustu. 70,6% svöruðu Síminn. 29,4 Vodafone.

Vodafone kvartaði einnig undan útvarpsauglýsingum Símans þar sem sagði að félagið hefði lokað á hliðrænar útsendingar RÚV. Við stöndum við þá fullyrðingu enda kemur það fram á heimasíðu Vodafone.

Við þau tímamót þegar slökkt var á hliðrænu kerfi RÚV hugsa margir sér til hreyfings varðandi sjónvarpsmál sín og fannst okkur því mikilvægt að kynna Sjónvarp Símans sem valkost á þeim tímapunkti.

Við hjá Símanum erum stolt af Sjónvarpi Símans. Tækninýjungarnar hafa verið miklar síðustu ár. Síminn kynnti Tímaflakk í Sjónvarpi Símans í janúar 2013. Nú er þetta Tímaflakk á yfir 100 sjónvarpsstöðvum. Við erum með VOD-leiguna og þar eru 4,300 titlar. Með Sjónvarpi Símans má syngja 160 karókílög. Þetta hefur gerst á stuttum tíma og við viljum að fólk viti af þessum fjölbreyttu afþreyingarmöguleikum í Sjónvarpi Símans.