Sam tekur þátt í Dancing with the Stars

Fyrsti homminn sem hefur verið valinn í nýliðavali NFL-deildarinnar, Michael Sam, er ekki af baki dottinn.

Hann komst ekki lengra en í æfingahóp hjá St. Louis og Dallas á nýliðnu tímabili í NFL-deildinni og á því enn eftir að spila leik þar. Sjálfur er hann á því að hann væri búinn að spila í deildinni ef hann væri ekki samkynhneigður.

Sam er ekki enn kominn að hjá öðru félagi en ætlar að halda áfram að berjast.

Í millitíðinni mjólkar hann frægðina í dansþættinum Dancing with the Stars. Það var tilkynnt í dag að Sam verði í þættinum.

Á meðal annarra þátttakenda eru fimleikastúlkan, Nastia Lukin, en hún vann gull á ÓL, og söngkonan Patti LaBelle.

NFL-leikmenn hafa löngum gert það gott í þessum þætti og þeir Emmitt Smith, Donald Driver og Hines ward hafa allir unnið.