Bubba Watson efstur á Travelers eftir fyrsta hring

Það er kunnuglegt nafn í efsta sæti á Travelers meistaramótinu sem fram fer á TPC River Highlands vellinum en Bubba Watson leiðir mótið eftir fyrsta hring.

Watson lék frábært golf og kom inn á 62 höggum eða átta undir pari en hann kann greinilega vel við sig á þessu móti sem hannn sigraði á árið 2010.

Nokkrir kylfingar deila öðru sætinu á sex höggum undir pari en meðal þeirra er Suður-Kóreumaðurinn Seung-Yul Noh og fyrrum PGA-meistarinn Keegan Bradley.

Skor þátttakenda er með besta móti enda aðstæður frábærar en alls eru 93 kylfingar undir pari eftir fyrsta hring.

Travelers mótið verður í beinni útsendingu á Golfstöðinni alla helgina.