Heillum horfinn Tiger lék sinn versta hring á ferlinum

Tiger Woods lék sinn versta hring á ferlinum á þriðja degi Memorial mótsins sem nú fer fram á Ohio í Bandaríkjunum en hann kom inn á 85 höggum eða 13 höggum yfir pari.

Woods náði niðurskurðinum í gær og byrjaði daginn einn undir pari en það breyttist fljótlega á hringnum í dag þar sem hann fékk aðeins einn fugl á Muirfield vellinum en sex skolla, tvo tvöfalda skolla og svo endaði hann á fjórföldum skolla á 18. holu.

Það er óhætt að segja að frammistaða þessa fyrrum besta kylfings heims komi á óvart en hann hefur æft stíft að undanförnu og sýndi á síðasta hring í gær mörg góð tilþrif.

Woods hefur þá leikið tvo verstu hringi sína á ferlinum á PGA-mótaröðinni í ár en hann lék á 82 höggum á Phoenix Open fyrr á árinu.