Leita sáttar um flutningskerfi

„Það er mikilvægt að sem mest sátt ríki í samfélaginu um hlutverk Landsnets og áherslur og að skilningur sé fyrir hendi á mikilvægi flutningskerfis raforku sem hluta af innviðum samfélagsins.

Við viljum kappkosta að ná fram þessari sátt og þar er samfélagsábyrgð, samtvinnuð stefnu fyrirtækisins, mikilvæg,“ segir Guðmundur Ingi Ásmundsson, forstjóri Landsnets, í tilefni þess að Landsnet gengur til samstarfs við Festu, miðstöð um samfélagsábyrgð fyrirtækja.

Með aðild að Festu fær Landsnet aðgang að tengslaneti Festu og hagnýtri þekkingu og rannsóknum á sviði samfélagsábyrgðar, segir í tilkynningu. Fyrirtækin sem gengið hafa til samstarfs við Festu eru á sjöunda tuginn, að sögn Ketils B. Magnússonar, framkvæmdastjóra Festu.