Margir bílar lent utan vegar í dag

Talsvert hefur verið um að bílar hafi lent utan vegar á Suðurlandi í dag vegna óveðursins. Færðin er afar slæm og biður lögregla fólk um að vera ekki á ferðinni að óþörfu. Lögreglan á Suðurlandi bíður nú átekta um hvort loka þurfi Hellisheiðinni.

Að minnsta kosti tveir strætisvagnar höfnuðu utan vegar um hádegisbil í dag, í Hveradalabrekku á Suðurlandsvegi og í Þrengslum. Bundnar eru vonir við að vind taki fljótt að lægja svo þeir geti haldið för sinni áfram, að sögn varðstjóra hjá lögreglunni á Suðurlandi. Þá hefur að minnsta kosti einn flutningabíll farið út af og nokkrir fólksbílar, en engan hefur sakað.

Þæfingur er á Hellisheiði og mjög slæmt skyggni og hefur Vegagerðin beðið fólk um að fara frekar um Þrengsli, en þar er krapi og skafrenningur. Á Suðurlandi er víða krapi eða hálkublettir á vegum.