Gefa 26 þúsund hlífðargleraugu

25.680 börn á aldrinum 10 til 15 ára fá fyrir áramótin gjafabréf fyrir svokölluðum flugelda­gleraugum. Undanfarin ár hafa Slysavarnafélagið Landsbjörg, Blindrafélagið, Sjóvá, Pósturinn og Prentsmiðjan Oddi unnið að forvörnum til að fyrirbyggja augnslys af völdum flugelda með því að gefa börnum slík hlífðargleraugu.

„Er það von þeirra sem að verkefninu standa að gleraugun verði til þess að ekkert þeirra slasist á augum um áramótin,“ segir í umfjöllun á vef Landsbjargar. Þá er ítrekað að allir ættu að nota flugeldagleraugu, burtséð frá aldri eða því hvort verið sé að skjóta eða horfa á.

„Gjafabréfum á flugeldagleraugu má framvísa á öllum flugeldamörkuðum björgunarsveita Slysavarnafélagsins Landsbjargar til að fá gleraugun afhent. Einnig fylgja flugeldagleraugu öllum fjölskyldupökkum sem seldir eru hjá björgunarsveitum.“