Cumberbatch gifti sig á Valentínusardaginn

Breski leikarinn Benedict Cumberbatch og unnusta hans, Sophie Hunter, giftu sig á Valentínusardaginn.

Cumberbatch og Hunter trúlofuðu sig í nóvember og eiga von á sínu fyrsta barni saman.

Athöfnin var haldin í bænum Mottistone sem er á Isle of Wight á Englandi. Brúðkaupið er talið hafa verið smátt í sniðum með aðeins um hundrað boðsgestum.

Getgátur eru uppi um að leikarinn Martin Freeman hafi verið svaramaður Cumberbatch á stóra deginum en Freeman leikur hægri hönd Sherlocks Holmes, John Watson lækni, í þáttum um einkaspæjarann snjalla sem Cumberbatch leikur.