Dregið úr leit þar til frekari vísbendingar berast

Dregið verður úr leitinni að Herði Björnssyni sem saknað hefur verið í tæpar tvær vikur. Leitinni verður framhaldið næstu daga, en þátttaka björgunarsveita verður takmörkuð. Lögregla og björgunarsveitir funduðu um stöðu málsins í dag.

„Við erum bara í ákveðinni biðstöðu núna. Við erum með mannskap og hættum engu og erum á fullu að leita, en erum að vinna úr vísbendingum og skoða hvað gert var um helgina,“ segir Ágúst Svansson, aðalvarðstjóri lögreglunnar á höfuðborgarsvæðinu.

Hann segir töluvert hafa borist af vísbendingum, og hvetur fólk til að halda áfram að hafa augun opin fyrir Herði. „Vísbendingarnar hafa enn sem komið er ekki leitt okkur neitt, því miður. En við vinnum úr öllum ábendingum og ef svo ber undir förum við í stórleit. En það er bara þannig að menn eru svolítið líkir í dag, þ.e með skegg og sítt hár. En við hlaupum á eftir öllum vísbendingum.“

Ágúst bindur vonir við að Hörður haldi sig innivið, en segir afar erfitt að leita einhvers sem ekki vilji finnast. „Við auðvitað vonum að hann haldi sig við kjöraðstæður og hafi það gott. Aðalmarkmið okkar er að hafa uppi á honum, hvernig sem við förum að því.“

Um sjötíu björgunarsveitarmenn leituðu Harðar í nótt, án árangurs. Tæpar tvær vikur eru frá því að Hörður sást síðast, en það var hinn 14. október á Laugarásvegi. Þá var hann skólaus. Talið er að hann sé klæddur í svartar buxur og gráa peysu, áþekka þeirri sem hann er klæddur í á meðfylgjandi myndum. Hann er 188 sentímetrar á hæð, grannur, ljóshærður og með rautt skegg.