Staða námsráðgjafa fullmönnuð

Staða námsráðgjafa sem sinnir föngum á Suðurlandi er nú fullmönnuð. Fjallað var um niðurskurð í málaflokknum í desembermánuði á síðasta ári þegar staða námsráðgjafa sem sinnir sérstaklega föngum sem stunda nám, var síðasta haust skorin niður úr 100 prósent stöðu í 50 prósent.

Niðurskurðurinn hafði mikil áhrif á gæði náms fanga. Brotinn námsferill fanga krefst oft greiningar og menntunarstaða íslenskra fanga er verri en annars staðar á Norðurlöndum.

Í skýrslu Ríkisendurskoðunar 2008 kom fram að námsárangur fanga hafði batnað töluvert á milli ára og var það rakið til starfs námsráðgjafa sem þá starfaði í fullri stöðu. Mælti Ríkisendurskoðun með því að hlúa að því fyrirkomulagi til frambúðar. Páll Winkel, forstöðumaður Fangelsismálastofnunar, segir ánægju með fyrirkomulagið og segir algjört grundvallaratriði að menn hafi góðan kost á námi eða vinnu meðan þeir afplána dóm sinn.

„Menn eru betur undirbúnir til þess að taka þátt í samfélaginu. Hvort sem það er að læra að lesa og skrifa eða fara í háskólanám.“