Kúabóndi hvetur Bændasamtökin til að kæra Vilhjálm Bjarnason

Daníel Magnússon, kúabóndi í Akbraut í Holtum í Rangárþingi ytra hvetur Bændasamtök Íslands til að kæra Vilhjálm Bjarnason, alþingismann Sjálfstæðisflokksins fyrir ærumeiðingar í garð bænda vegna ummæla hans í þætti Sigurjóns M. Egilssonar á Sprengisandi á Bylgjunni síðasta sunnudag þar sem hann sagði íslenskan landbúnað sérstakt vandamál sem gæti varla versnað við inngöngu í Evrópusambandið.

Þá bætti hann því við að landbúnaður væri aðeins hálft eða eitt prósent af landsframleiðslu. Daníel er verulega ósáttur við þingmanninn og vill kæru á hann.

„Þetta eru ærumeiðandi ummæli eins og hann talar um okkur bændur. Þetta er ærumeiðing á heila starfstétt, það er það sem er. Ég veit ekki hvað Bændasamtökin gera en mér finnst allt í lagi að kæra hann. Við erum kærðir ef við förum ekki eftir því sem við eigum að gera,“ segir Daníel.

Hann segir Vilhjálm ekki vera að standa sig varðandi bændur.

„Nei, hann er ekki að standa sig varðandi okkur bændur, allavega hvað þetta varðar og hvernig hann talar til okkar og telur okkur vera hálfgerðar afætur á þjóðfélaginu. Stórhluti af þeim peningum, sem við fáum frá ríkinu fer til baka í stofnanir, sem eru tengdar ríkinu“.

Daníel segir að bændur láti endalaust traðka á sér án þess að veita viðspyrnu, nú sé komið nóg.

„Já, alltof mikið, það er bara ekki hlustað á okkur, t.d.ef við þurfum að skila forðagæsluskýrslu þá þurfum við að fá Íslykil, sem opnar inn á aðgang á Þjóðskrá. Hvað hefur Matvælastofnun að gera með lykil af því, eru þeir að fara að stunda persónunjósnir um okkur bændur eða hvað eru þeir að gera,“ segir Daníel ennfremur.