Spá 2,4% verðbólgu í lok árs

Íslandsbanki spáir því að vísitala neysluverðs (VNV) muni hækka um 0,1% í október frá septembermánuði. Ef spáin gengur eftir helst verðbólga óbreytt í 1,9%. Verðbólga verður því áfram undir 2,5% verðbólgumarkmiði Seðlabanka Íslands. Þetta kemur fram í frétt á vef Íslandsbanka.

Verðbólguhorfur hafa batnað

Bankinn telur að verðbólgan verði rétt innan við verðbólgumarkmið Seðlabankans í árslok. Verðbólguhorfur hafi batnað frá síðustu spá vegna gengisstyrkingar krónu og endurmats bankans á launaþróun á seinni hluta spátímans. Horfur séu á vaxandi verðbólgu í kjölfarið. Verður hún samkvæmt spánni rétt yfir verðbólgumarkmiðinu að jafnaði á næsta ári, en nærri efri mörkum markmiðsins árið 2017. 

Bankinn telur að verðbólga muni aukast lítillega eftir því sem nær dregur árslokum og skammdegið tekur við. Að stórum hluta er ástæðan sú 0,5% mánaðarlækkun VNV í nóvember í fyrra dettur út úr 12 mánaða mælingu VNV. Einnig munu áfram togast á innlendur kostnaðarþrýstingur annars vegar, og innflutt verðstöðnun eða –hjöðnun vegna styrkingar krónu og lítillar erlendrar verðbólgu hins vegar. 

Verðbólga 2,4% í lok árs

Íslandsbanki gerir ráð fyrir 0,1% hækkun VNV í nóvember og 0,2% hækkun í desember. Samkvæmt þeirri spá mun verðbólga mælast 2,4% í lok árs. Í spánni kemur fram að innlendur verðbólguþrýstingur er umtalsverður þessa dagana. Þar vegur þungt umtalsverð hækkun launa hjá stórum hluta vinnumarkaðarins í nýlegum kjarasamningum, en einnig kemur til viðvarandi hækkun raunverðs íbúðarhúsnæðis og vaxandi framleiðsluspenna á ýmsum sviðum hagkerfisins. Munu þessir þættir þrýsta verðbólgu upp á við. Á móti vegur talsverð hækkun á gengi krónunnar undanfarið og lítill innfluttur verðþrýstingur. Bankinn spáir því að verðbólga muni aukast jafnt og þétt á næsta ári, og gerir ráð fyrir 3,4% verðbólgu í lok ársins 2016 en 3,6% yfir árið 2017. Verðbólga verður samkvæmt spánni rétt undir efri mörkum verðbólgumarkmiðs Seðlabankans seinni hluta spátímabilsins.

Í októbermælingu VNV eru horfurnar í stórum dráttum þannig að innlendir liðir muni fremur vega til hækkunar, en innfluttir til lækkunar. Af hækkunarliðum í spá bankans vegur þyngst húsnæðisliðurinn, sem áætlað er að muni hækka um rúm 0,4% milli mánaða (0,12% í VNV). Er það að stærstum hluta vegna 0,7% hækkunar á reiknaðri húsaleigu (0,10% í VNV).

Flugfargjöld til útlanda hækki um 3,5%

Þá er gert ráð fyrir 3,5% hækkun á flugfargjöldum til útlanda, og í heild hafa flugfargjöld áhrif til 0,04% hækkunar VNV í október. Aðrir liðir hafa samanlagt áhrif til 0,02% hækkunar VNV í spá bankans. Á móti vega ýmsir undirliðir VNV til lækkunar hennar í október. Tengjast þeir flestir áhrifum styrkingar krónu síðustu mánuði á innflutningsverð. Þyngst vegur þar tæplega 0,4% lækkun á matvöru og drykkjum (-0,05% í VNV). Bónus tilkynnti nýverið um lækkun á ýmsum innfluttum vöruflokkum og teljur bankinn að sú lækkun, ásamt viðbrögðum samkeppnisaðila við bæði styrkingu krónu og þessu útspili, muni ráða mestu um framangreinda lækkun.

Eldsneytisverð lækki um 1%