Útboð búnaðar í Glerárdalsvirkjun í pípunum

Fallorka ehf., sem er að stærstum hluta í eigu Akureyrarkaupstaðar, skilaði yfir 100 milljóna króna hagnaði í fyrra.

Félagið framleiðir rafmagn til endursölu á Eyjafjarðarsvæðinu og byggir upp raforkuver til framleiðslu. Andri Teitsson, framkvæmdastjóri Fallorku, er ánægður með árangurinn og segir félagið í stakk búið til að efla raforkuframleiðslu enn frekar. „Allt hélst í hendur á síðasta starfsári. Framleiðsla í virkjunum okkar í Djúpadal gekk áfallalaust fyrir sig og markaðsstarf gekk einnig vel. Við erum stolt af því að geta boðið gott verð á rafmagni til almennings um þessar mundir en okkar verð eru hagstæðari en það sem stóru fyrirtækin í landinu eru að bjóða,“ segir Andri.

Fallorka mun á næstu misserum hefjast handa við byggingu nýrrar virkjunar ofarlega í Glerárdal, ofan Akureyrar, og verður miðlunarlón inni í dalnum sem á að gefa af sér rúmlega þrjú megavött. „Við erum þessa dagana að hefja útboð á vél- og rafbúnaði fyrir nýja virkjun ofan Akureyrar. Ef allt gengur að óskum verður sú virkjun tekin í notkun snemma árs 2017,“ segir Andri. Með þessum framkvæmdum opnast möguleikar almennings á því að nýta sér Glerárdalinn sem fólkvang. „Í leiðinni munum við leggja nýjan göngustíg inn Glerárdalinn sem mun gera dalinn mun aðgengilegri fyrir Eyfirðinga og ferðamenn til útivistar.