Almar í allri sinni dýrð á ljósmyndasýningu í Crymogeu

Ljósmyndir sem myndlistarneminn Almar Atlason tók af sér í glerkassanum í Listaháskóla Íslands verða til sýnis í sal Crymogeu við Barónsstíg í Reykjavík frá klukka 11 til 17 á morgun. 

Þetta er eini dagurinn sem myndirnar verða sýndar en Almar sjálfur verður viðstaddur sýninguna, sem nefnist ALMAR. Listaverk, frá klukkan 14.

Almar fór allslaus inn í kassann og reiddi sig á gjafmildi samfélagsins sem færði honum mat og annan varning svo hann gæti þraukað nakinn í kassanum í heila viku.

Meðal þess sem Almar fékk afhent inn um lúguna á kassanum var einnota Fuji-myndavél sem Almar notaði á meðan dvölinni stoð. Hefur hann framkallað filmuna og valdi 5 myndir sem stækkaðar eru í stærðinni 45 x 45 og voru gerð fimm eintök af hverri mynd.