Rannsókn lögreglu á meintum brotum lögreglumanns, sem grunaður er um að hafa stungið sektargreiðslum í vasann, er lokið og er málið komið á borð ríkissaksóknara. Þetta staðfestir Jónas Wilhelmsson yfirlögregluþjónn á Austurlandi í samtali við Vísi.
Málið kom upp í ágúst síðastliðnum og var tilkynnt til ríkissaksóknara sem fól í framhaldinu lögreglunni á Eskifirði að rannsaka málið.
Málið varðar sektir sem erlendir ferðamenn eiga að hafa greitt með reiðufé en rannsóknin var afar tímafrek vegna þess að lögreglan þurfti að óska eftir gögnum erlendis frá en einnig var reynt að hafa upp á þeim ferðamönnum sem voru stöðvaðir af umræddum lögreglumanni til að fá mynd af umfangi meintra brota hans.
Samkvæmt heimildum Vísis er talið að meintur fjárdráttur lögreglumannsins nemi milljónum króna.
Meintur fjárdráttur lögreglumanns nemur milljónum króna
Tengdar fréttir
Lögreglan hefur haft upp á ansi mörgum ferðamönnum
Rannsókn á máli lögreglumanns á Seyðisfirði á lokastigi
Sakaður um að stinga sektargreiðslum í eigin vasa
Lögreglumaðurinn við embætti lögreglunnar á Seyðisfirði, sem grunaður er um alvarlegt brot í starfi, er talinn hafa stungið sektargreiðslum í eigin vasa. Um er að ræða sektir sem erlendir ferðamenn greiddu í reiðufé.
Algjör undantekning ef ferðamenn fá að greiða með reiðufé
„Við reynum að setja verkferla til að fyrirbyggja að lögreglumenn geti verið vændir um að misnota fé,“ segir Guðbrandur Sigurðsson, aðalvarðstjóri hjá umferðardeild lögreglunnar á höfuðborgarsvæðinu.
