Frumtak II fjárfestir í Watchbox fyrir 50 milljónir

Nýsköpunarfyrirtækið Appollo X hefur gert samning við Frumtak 2 um 50 milljóna króna fjármögnun. Appollo X hefur undanfarna mánuði unnið að þróun snjallsímaforritsins Watchbox og snýr fjárfesting Frumtaks 2 ekki síst að því að styðja við áframhaldandi uppbyggingu þess verkefnis, segir í tilkynningu. Fram að þessu hefur frumkvöðullinn og fjárfestirinn Kjartan Örn Ólafsson fjármagnað félagið og mun hann áfram gegna þar stjórnarformennsku. Fjárfesting þessara tveggja aðila í AppolloX nemur samtals 70 milljónum króna.

Watchbox appið auðveldar fólki að deila myndum og stuttum myndböndum innan hópa. „Reiknað er með að um þrjúþúsund milljörðum mynda verði deilt í gegnum snjallsíma á árinu sem er að líða. Það eru fleiri myndir en hafa verið teknar á filmu frá upphafi. Markaðurinn fer ört vaxandi og það eru mikil tækifæri fólgin í nýjum dreifileiðum fyrir myndefni og munu tækifærin eingöngu aukast á komandi árum”, segir Davíð Örn Símonarson framkvæmdastjóri Appollo X.

Appollo X teymið er ekki að koma að smáforritagerð í fyrsta sinn en meðal fyrri forrita má nefna samskiptamiðilinn Blendin og smáleikinn Dusty Dots auk þess sem sama teymi hélt úti Vaktinni, sem var ritstýrður hópaðgangur 25.000 Íslendinga á Snapchat.

„Við höfum fylgst með Appollo X teyminu í nokkur ár og teljum að þarna sé á ferðinni frábært teymi sem eigi eftir að gera stórkostlega hluti.  Við hlökkum til að verða þeim samferða á þeirri leið” segir Eggert Claessen framkvæmdastjóri Frumtaks 2.

Teymið leggur land undir fót í byrjun janúar og mun flytja til Bandaríkjanna til þess að styðja við áframhaldandi vöxt fyrirtækisins.

Nánar verður fjallað um fjárfestingasjóðinn Frumtak II í Markaðnum á morgun.