Samþykkja skilyrði fyrir arðgreiðslum Orkuveitu Reykjavíkur

Eigendur Orkuveitu Reykjavíkur (OR) hafa samþykkt tillögu stjórnar um fjárhagsleg skilyrði fyrir því að arður verði greiddur til eigenda í framtíðinni.

Í tilkynningu frá OR kemur fram að forstjórinn Bjarni Bjarnason segi samþykktina afar mikilvæga og að hún sýni hve eigendur OR telji mikilvægt að tryggja góðan rekstur og traustan fjárhag OR til framtíðar.

Tillagan var samþykkt samhljóða en eigendur OR eru þrír; Reykjavíkurborg, sem á 93,5 prósenta hlut, Akraneskaupstaður sem á 5,5 prósenta hlut og Borgarbyggð sem á eins prósenta hlut.

„Sveitarstjórnir allra eigenda hafa nú samþykkt tillögu stjórnar um að OR greiði eigendum ekki arð nema að fjárhagsstaða fyrirtækisins uppfylli tiltekin skilyrði. Þau snúa meðal annars að eiginfjárhlutfalli, lausafjárstöðu, skuldsetningu og hlutfalli hagnaðar sem greiða má út í formi arðs. Tillagan var samþykkt samhljóða af öllum sveitarfélögunum,“ segir í tilkynningunni.

Bjarni Bjarnason, forstjóri OR, segir að samþykkt eigendanna á arðgreiðsluskilyrðunum sýni skýran vilja þeirra til að standa vörð um þann árangur sem hefur náðst í að rétta við reksturinn og koma fjárhag Orkuveitu Reykjavíkur í gott horf.

„Sameiginlegt átak eigenda, stjórnar og starfsfólks hefur skilað því að markmiðum Plansins um bætta sjóðstöðu var náð á miðju árinu 2015, einu og hálfu ári á undan áætlun.

Hlutverk OR er að veita íbúum góða þjónustu á sanngjörnu verði. Mér sýnist að dótturfélögin – Veitur, Orka náttúrunnar og Gagnaveita Reykjavíkur – standi sig prýðilega í þeim efnum og þau stefna að því að gera enn betur,“ segir Bjarni.

Arðgreiðsluskilyrðin

Í samþykktinni um arðgreiðsluskilyrðin er gert ráð fyrir að stjórn samþykki arðsstefnu fyrir fyrirtækið, sem hljóta skuli staðfestingu eigenda. „Í samþykktinni eru fjárhagslegir mælikvarðar, sem uppfylltir skulu, áður en til arðgreiðslu kemur og arðgreiðslur mega ekki brjóta gegn.

Skilyrðin eru þessi:

„Samkvæmt Planinu, aðgerðaáætlun sem OR hefur unnið eftir frá árinu 2011, er ekki greiddur arður á gildistíma þess. Planið er í gildi til ársloka 2016,“ segir í tilkynningunni.