Byrja árið í köldum sjó

Sjósundsiðkendur fagna nýju ári í tíunda sinn með sundferð í Nauthólsvík í hádeginu á nýársdag.

„Það er mál manna að gleði þátttakenda aukist eftir því sem sjórinn er kaldari,“ segir Kristín Helgadóttir, stjórnarmaður í Sjósunds- og sjóbaðsfélagi Reykjavíkur (SJÓR), í tilkynningu félagsins. Reikna megi með því að sjórinn verði í kringum eina gráðu. Þá hafi sú hefð orðið til síðustu árin að klæða sig upp og fara í sjóinn í sem litríkustum fötunum eða vel skreyttur. Sumir hafa jafnvel komið í jóladressinu.“

Baðgestir safnast saman við afgreiðsluna í Nauthólsvík og fara saman í sjóinn klukkan tólf. Sífellt fleirum finnst þetta ómissandi upphaf á góðu ári,“ segir Kristín.