Mikilvægasta niðurstaða frá stofnun WTO

Samþykkt var bann við útflutningsbótum fyrir landbúnaðarafurðir á ráðherrafundi Alþjóðaviðskiptastofnunarinnar (WTO) sem lauk fyrir helgi í Kenía.

Bannið er sagt marka tímamót og lýsti Roberto Azavêdo, framkvæmdastjóri WTO, því svo að ákvörðunin væri mikilvægasta niðurstaða stofnunarinnar á sviði landbúnaðar frá stofnun hennar fyrir 20 árum. „Útflutningsbætur skulu að fullu afnumdar árið 2020 fyrir iðnríki og 2023 fyrir þróunarríkin. Ísland hefur þegar afnumið slíkar bætur,“ segir á vef utanríkisráðuneytisins.

Þá var á fundinum staðfest niður­staða um endurskoðun samnings um upplýsingatæknivörur.

Hún er sögð fela í sér að þátttökuríki felli niður tolla á rúmlega 200 upplýsingatæknivöruflokkum. Rúmlega 50 ríki eru sögð aðilar að samkomulaginu, þar á meðal ríki Evrópusambandsins, Bandaríkin, Kína, Kanada, Japan, Sviss, Noregur og Ísland.

„Á árunum 2012 og 2013 fluttu íslensk fyrirtæki út vörur, svo sem rafeindavogir, röntgentæki og ýmis fjarskiptatæki, að verðmæti samtals 9 milljarða króna sem njóta munu tollfríðinda samkvæmt samningnum.“

Fyrir sendinefnd Íslands fór Martin Eyjólfsson, fastafulltrúi í Genf. Hann er í ávarpi sínu sagður hafa lagt áherslu á nauðsyn þess að WTO sýndi meiri sveigjanleika í störfum sínum og léti þrátefli í Doha-viðræðunum ekki koma í veg fyrir að unnið yrði að málum sem meiri samstaða ríkti um. Hann hafi jafnframt lagt áherslu á mikilvægi þess að setja frekari skorður við ríkisstyrkjum í sjávarútvegi. „Þrátt fyrir breiðan stuðning á fundinum við tillögu um bann við ríkisstyrkjum sem renna til veiða á ofveiddum fiskistofnum eða ólöglegra fiskveiða náðist ekki samstaða um tillöguna.“