Borga langt undir Norðurlandaverði

Hákon Björnsson, framkvæmdastjóri Thorsil, segir fyrirtækið mjög sátt við það orkuverð sem þeir fengu í samningum við Landsvirkjun. Á sama tíma fullyrða Samtök iðnaðarins og fleiri að Landsvirkjun bjóði ekki samkeppnishæft verð miðað við verðþróun á öðrum raforkumörkuðum. Þessu hafnar Landsvirkjun alfarið en fyrirtækið stendur nú í erfiðum samningaviðræðum við Norðurál um nýjan raforkusamning.

Samkvæmt skýrslu frá lífeyrissjóðnum Stefni greiðir Thorsil Landsvirkjun 43 dollara á megavattstund með flutningskostnaði. Fram kemur í skýrslunni að þetta verð sé allt að helmingi lægra en í öðrum löndum, til samanburðar sé raforkuverðið 66 dollarar í Hollandi og 57 dollarar í Skandinavíu.

„Allir sem kaupa vilja sem lægst verð og þeir sem selja vilja sem hæst verð, en við náðum samkomulagi um verð og erum sáttir við þann samning,“ segir Hákon Björnsson, framkvæmdastjóri Thorsil.

Vilhjálmur Birgisson, formaður Verkalýðsfélag Akraness, bendir á að raforkuverð sé mun lægra í Skandinavíu um þessar mundir. Raforkuverðið Nordic Power mælist nú milli 17 og 20 evrur. „Það þarf að passa það að samkeppnisskilyrði fyrirtækja hér á landi sé með sambæranlegum hætti og í þeim löndum sem við erum að bera okkur saman við. Ef það er ekki, þá eru umtalsverðar líkur á því að við töpum störfum.“

Í pistli gagnrýndi Almar Guðmundsson, framkvæmdastjóri Samtaka iðnaðarins, þróun raforkuverðs á Íslandi. Hann benti á að 2011 og 2012, þegar Landsvirkjun markaði núverandi verðstofn, voru algeng verð á erlendum mörkuðum um 50-60 dollarar á megavattstund. 

„Þetta virðist þannig að menn horfi ennþá á stöðuna eins og hún var þá, en hún hefur breyst ansi mikið síðan. Landsvirkjun býður lengri tíma samninga eftir því sem ég kemst næst en almennt tíðkast í Evrópu. Hins vegar er verðið í Evrópu orðið það lágt að við teljum eðlilegt að ef menn ætla að bjóða samkeppnishæf kjör eins og Landsvirkjun boðar, þá hljóti þeir að þurfa að taka bæði tillit til hratt lækkandi verðs og annarra sjónarmiða,“ segir Almar.

Hörður Arnarson, forstjóri Landsvirkjunar, segist telja að verið sé að bjóða samkeppnisfæra raforkusamninga, það endurspeglist í mikilli eftirspurn. „Það er í raun meiri eftirspurn heldur en við ráðum við,“ segir hann.

Hörður segir Landsvirkjun fylgjast mjög grannt með því hvernig raforkumarkaður þróast erlendis. „Það sem hefur verið að breytast erlendis er fyrst og fremst skammtímamarkaðurinn, en við teljum að verð á langtímasamningum sé ekki að breytast mjög mikið. Með langtímasamningum þarf verðið að duga fyrir nýbyggingakostnaði virkjanna. Hann er umtalsvert hærri erlendis en við erum að bjóða.“