Bein útsending: Norðfirðingar fá stærsta harða pakkann sinn í sögunni

Uppfært klukkan 12:00

Beitir er lagstur að bryggju á Norðfirði og beinni útsendingu er lokið.

Nýr Beitir mun sigla inn á Norðfjörð klukkan 11 í dag, á Þorláksmessu. Síldarvinnslan hvetur íbúa bæjarins til að leggja leið sína niður á hafnarbakkann í miðbænum til að fagna skipinu enda sé um að ræða stærsta harða pakka sem Norðfirðingar hafa fengið um jól.

Bein útsending er frá komu skipsins og má sjá hana í spilaranum hér að neðan. Beitir mun sigla um fjörðinn svo að allir geti virt fyrir sér nýja skipið.

Beitir er stærsta uppsjávarskip í eigu Íslendinga og reyndar stærsta skip sinnar tegundar sem stundar veiðar í norðanverðu Atlantshafi. Árið 1973 festi Síldarvinnslan kaup á Berki sem þá var stærsta uppsjávarskip í eigu Íslendinga.

Þegar Börkur var væntanlegur til landsins hinn 10. febrúar árið 1973 sagði Jóhann K. Sigurðsson, þáverandi útgerðarstjóri Síldarvinnslunnar, að hann væri svo ótrúlega stór að það liði yfir hálfan bæinn þegar hann kæmi siglandi fyrir Eyrina, að því er segir á vef Síldarvinnslunnar.

Samanburð á skipunum má sjá hér að neðan

Börkur (1973)

Stærð 711 brúttó tonn 

Burðargeta 750 tonn (mest 1.150 síðar)

Aðalvél 1.200 hö



Beitir (2015)

Stærð 4.138 brúttó tonn

Burðargeta 3.200 tonn

Aðalvél 7.000 hö + 2.950 hö (hjálparvél)