Landsbjörg fær fimm krónur af lítranum

Fimm krónur af hverjum keyptum eldsneytislítra hjá Olís og ÓB í dag og á morgun renna til Slysavarnafélagsins Landsbjargar. Jón Ólafur Halldórsson, forstjóri Olís, og Jón Svanberg Hjartarson, framkvæmdastjóri Slysavarnafélagsins Landsbjargar, stóðu þjónustuvaktina hjá Olís í Álfheimum í morgun og dældu þeir eldsneyti á bifreiðar viðskiptavina.

„Slysavarnarfélagið Landsbjörg hefur innan sinna raða þúsundir sjálfboðaliða sem vinna ómetanlegt starf og eru alltaf til staðar í hvaða veðrum og aðstæðum sem er og koma öðrum til bjargar á ögurstundu. Við vonum að landsmenn verði til taks fyrir Slysavarnafélagið Landsbjörg í dag og á morgun og sýni þeim stuðning,” segir Jón Ólafur í tilkynningu.

Um er að ræða hluta af verkefni Olís „Gefum og gleðjum“ sem staðið hefur yfir í desember. Á undanförnum vikum hafa Styrktarfélag einhverfra barna, Mæðrastyrksnefnd og Neistinn, styrktarfélag hjartveikra barna, og Geðhjálp notið góðs af verkefninu. Alls söfnuðust ein og hálf milljón króna fyrir hvert félag í verkefninu samkvæmt tilkynningunni.

Smári Sigurðsson, formaður Slysavarnafélagsins Landsbjargar, segir mikilvægt fyrir félagið að eiga góða styrktaraðila.

„Þrátt fyrir að allt starfið sé unnið í sjálfboðavinnu kostar mikla fjármuni að halda úti öflugu slysavarna- og björgunarstarfi um land allt. Við erum þakklát fyrir þann góða stuðning sem Olís sýnir félaginu, bæði með þessari söfnun, sem og að vera einn af aðal styrktaraðilum þess.“